Casa do Concello
Plan xeral de ordenación municipal (P.X.O.M.)
A Consellería de Medio Ambiente, Territorio e Infraestruturas, por Orde do 11 de xaneiro de 2011 publicada no Diario Oficial de Galicia nº 16, do 25.01.2011, aprobou definitivamente o Plan xeral de ordenación municipal do Concello de Outes.
En cumprimento do que dispoñen os artigos 92 da Lei 9/2002, do 30 de decembro, de ordenación urbanística de Galicia, e 70.2 da Lei 7/1985, do 2 de abril, reguladora das bases de réxime local, publícase a normativa do antedito Plan, que entrará en vigor ao día seguinte da súa publicación no Boletín oficial da provincia da Coruña.
O PXOM é o documento que regulará o desenvolvemento urbanístico e con esa finalidade clasifica, de conformidade coa lei, o solo do municipio en urbano, urbanizable, de núcleo rural e rústico; deseña os núcleos urbanos da Serra de Outes, Pontenafonso, O Cruceiro de Roo e O Freixo e as súas áreas de crecemento; cataloga e define a totalidade dos núcleos rurais do municipio e as súas zonas de expansión; e define o solo rústico e as súas diversas categorías (común, de protección agrícola, de protección de costa, de protección paisaxística, etc.).
O PXOM tamén establece a rede viaria e os sistemas de infraestruturas e equipamentos públicos necesarios para o desenvolvemento económico (parque empresarial) e o benestar social do municipio (espazos libres e zonas verdes, instalacións escolares e deportivas, equipamentos de servizos sociais, instalacións sanitarias e culturais, redes de abastecemento e depuración de augas, redes de distribución de enerxía eléctrica, etc.).
O PXOM contén unha serie de documentos esixidos pola Lei 9/2002, do 30 de decembro, de ordenación urbanística de Galicia, que se presentan en catro tomos:
-
Os Tomos I e II conteñen a información sobre a situación actual ou de partida do municipio.
-
Os Tomos III e IV conteñen a nova ordenación que se propón. A persoa que queira saber como o PXOM lle pode afectar nunha propiedade determinada deberá ir directamente a estes tomos.
Para os efectos de facilitar a súa consulta e guiar ao lector, desglosamos a continuación o PXOM por tomos cunha explicación de cada documento:
TOMO I
Contén catro documentos:
-
Memoria, estratexia de actuación e estudo económico: describen os datos do medio xeográfico, da evolución da poboación, da estrutura urbana e das infraestruturas e equipamentos existentes; e recolle os obxectivos, criterios e actuacións propostas para definir o modelo de desenvolvemento urbanístico do municipio, así como os datos cuantitativos das capacidades das distintas clases de solo e a definición dos sistemas xerais de infraestruturas e equipamentos. Conclúe co estudo económico das actuacións necesarias para acadar os obxectivos propostos.
-
Planos de información: recollen ou reflicten sobre os planos do municipio os datos físicos, xeográficos, poboacionais e económicos aos que se refiren os documentos do apartado anterior e, en xeral, a situación urbanística actual ou de partida das distintas áreas do territorio municipal.
-
Informe de sustentabilidade ambiental (ISA): describe a situación actual do medio ambiente municipal, os criterios e obxectivos ambientais estratéxicos, a identificación dos impactos e efectos negativos, as medidas previstas para minguar e corrixir eses efectos, a descrición das alternativas analizadas, o sistema de indicadores e o plan de seguimento, o resumo non técnico do propio ISA, e o informe sobre a viabilidade económica das alternativas e das medidas para prever, minguar ou corrixir os efectos negativos do PXOM. Tamén contén o resultado do proceso de participación na elaboración do PXOM.
-
Proposta de memoria ambiental: contén a análise do proceso de avaliación ambiental estratéxica, a integración das variables ambientais no planeamento, as conclusión e síntese final sobre a integración dos aspectos ambientais no Plan, a relación de informes sectoriais, a memoria ambiental e a cuprimentación da antedita memoria.
TOMO II
Contén tres documentos
-
Estudo do medio rural: é unha esixencia da Lei de cara a garantir a conservación e mellora dos seus valores ecolóxicos, ambientais, paisaxísticos, culturais e as súas potencialidades produtivas. Contén unha análise dos usos do solo, cultivos, a paisaxe, a tipoloxía das edificacións e construcións tradicionais, a estrutura da propiedade e a rede viaria.
- Modelo de asentamento poboacional: complementa o anterior por medio da análise dos elementos que constitúen o marco comarcal e parroquial do medio rural, o sistema de núcleos rurais e a súa relación do medio natural produtivo. Contén o catálogo ou inventario de todos os núcleos rurais existentes no municipio, ordenados por parroquias coas súas fichas correspondentes. A ficha contén o nome, situación, número de habitantes, número de edificacións e a súa tipoloxía, estrutura viaria, equipamentos, elementos protexidos, e plano con fotografía aérea.
- Catálogo: contén o inventario e descrición de todos aqueles elementos que por mor dos seus valores naturais ou culturais deben ser conservados, protexidos e/ou recuperados (arquitectura civil, arquitectura relixiosa, xacementos arqueolóxicos, construcións populares, cruceiros, obras civís, etc.) coas súas correspondentes fichas.
TOMO III
Contén tres documentos:
- Normativa: Contén:
-
As normas urbanísticas xerais do PXOM (prazo de vixencia, ámbitos espaciais, criterios de interpretación e aplicación, instrumentos de desenvolvemento, de xestión e de execución) e os dereitos e deberes xerais dos propietarios do solo.
-
As normas urbanísticas específicas das diferentes clases de solo (urbanos, de núcleo rural, urbanizables e rústicos), o réxime dos solos de sistemas xerais e dotacións (equipamentos e infraestruturas), e as normas de protección do patrimonio histórico, natural e do medio ambiente. As condicións das diferentes clases de usos do solo (residencial, industrial, de servizos, e dotacional, as condicións xerais para edificar (parcela mínima edificable, ocupación máxima da parcela, alturas, normas de calidade arquitectónica, as condicións de seguridade e hixiénicas), o procedemento de obtención das licenzas urbanísticas, as condicións de urbanización; e, finalmente, as ordenanzas reguladoras dos usos e edificacións en cada clase de solo (as ordenanzas reguladoras de solo urbano, as ordenanzas reguladoras de solo de núcleo rural, a regulación dos solos urbanizables, e a regulación dos solos rústicos).
-
-
Fichas de xestión: conteñen as bases e criterios de ordenación dos ámbitos de solo urbano non consolidado e de solo urbanizable que, neste último caso, deben ser desenvoltos por medio dos correspondentes plans parciais ou especiais.
- Planos de ordenación dos núcleos rurais do municipio agrupados por parroquias e ordenados alfabeticamente polo nome de cada parroquia:
TOMO IV
Este tomo contén os planos de clasificación de solo de todo o territorio municipal.
-
Planos Xerais: Para ter unha visión xeral do conxunto cómpre consultar estes planos. -
Planos detallados: abranguen as 23 follas ou cuadrículas nas que se divide cartograficamente o municipio, ordenadas de norte a sur e de leste a oeste. Na parte inferior dereita de cada folla pódese ver a distribución cartográfica do municipio para saber que cuadrícula ou cuadrículas concretas lle corresponde a cada parte.
-
Planos dos solos urbanizables: (delimitados e non delimitados)
-
Planos dos solos urbanos: Planos dos solos urbanos do Freixo, Pontenafonso, O Cruceiro de Roo e A Serra de Outes.
En resumo, para coñecer a ordenación concreta que lle corresponde a un determinado terreo é preciso identificar no plano correspondente a clase de solo a que pertence -urbano, urbanizable, de núcleo rural ou rústico- e logo consultar a ordenanza urbanística aplicable.